Sekretari amerikan i Mbrojtjes Lloyd Austin kritikoi ata që mbështesin tërheqjen nga përgjegjësia të shteteve të bashkuara të amerikës, duke theksuar domosdoshmërinë për udhëheqje të qëndrueshme të SHBA-së për të kontribuar në një botë sa më të sigurt, të lirë dhe të begatë. Austin mbrojti mbështetjen e gjatë të SHBA-së për Ukrainën dhe luftën e saj kundër rusisë, por edhe për izraelin, në luftën e tij kundër hamasit. "Si në Izrael ashtu edhe në Ukrainë, demokracitë po luftojnë kundër armiqve të pamëshirshëm që synojnë t'i asgjësojnë ata," tha Austin. "Dhe ne nuk do të lejojmë Hamasin apo Putinin të fitojnë. Dhe ne nuk do të lejojmë që armiqtë tanë të na ndajnë apo të na dobësojnë. Kështu, ndërsa shtojmë mbështetjen në Izrael, ne mbetemi të fokusuar në Ukrainë. Dhe ne jemi plotësisht të aftë për të projektuar pushtetin, për të mbështetur angazhimet tona, dhe për të drejtuar burimet në arena të shumta." Austin tha se në 21 muajt "e pushtimit të pasuksesshëm të Putinit, ushtria ruse është dobësuar ndjeshëm, kryesisht falë trupave të guximshme të Ukrainës". Arritjet, tha ai, janë gjithashtu rezultat i udhëheqjes dypartiake të SHBA-së dhe koalicionit të krijuar prej rreth 50 shtetesh. Që nga pushtimi rus në shkallë të plotë në shkurt 2022, SHBA-të i kanë dhënë Ukrainës ndihma sigurie me vlerë rreth 44 miliardë dollarë. Sekretari i Mbrojtjes tha se "Putini mendon gjithashtu se ai mund të fitojë", pasi beson se koalicioni perëndimor do të ndahet. "Por edhe një herë, Putini e ka gabim. Ukraina ka një rëndësi të madhe për Amerikën dhe për të gjithë botën," tha Austin. "Nëse nuk i rezistojmë agresionit të Kremlinit sot, nëse nuk i pengojmë agresorët e tjerë të mundshëm, ne vetëm do t'i inkurajojmë ata - dhe do të krijojmë mundësinë për më shumë gjakderdhje dhe kaos. Pushtimi rus i Ukrainës ofron një pamje të zymtë të një botë tiranie dhe trazirash që duhet të na bëjë të gjithëve të dridhemi” – tha Austin.