Arrestimi i një serbi të dyshuar për krime lufte në Kosovë, i quajtur Dragisha Millenkoviç, ka sjellë një valë protestash fare pranë Prishtinës, më saktë në Graçanicë. Me qindra qytetarë të ndarë në grupe kanë protestuar pranë stacionit policor në Graçanicë duke bllokuar për disa kohë edhe rrugën kryesore që lidh Prishtinën me Gjilanin e pjesë të tjera të Kosovës. Sipas policisë Kosovare, arrestimi i Dragisha Millenkoviç është bërë pasi ka dyshime të arsyeshme, se gjatë periudhës 1998-1999, kur ushtronte detyrën e gardianit të burgut në Prishtinë e në Lipjan, ka dhunuar e torturuar fizikisht e psikologjikisht, shqiptarë të ndaluar nga forcat serbe. Gjatë arrestimit dhe kontrillit në banesën e këtij të fundit, është gjetur dhe sekuestruar një armë pistoletë 9 milimetërshe, 135 fishekë, thikë dhe shufra hekuri Taiwan, por edhe sende të tjera, përfshi aparatit celular.