Tri ditë të bisedimeve për kontrollin e armëve bërthamore mes Shteteve të Bashkuara dhe Rusisë, pritet të nisin më 28 korrik në Vjenë. Përgjatë raundit të parë të bisedimeve muajin e kaluar të dyja shtetet kanë diskutuar për marrëveshjen e fundit mes tyre për këtë çështje, përkatësisht, Traktatin për Armët e Reja Strategjike, që përcakton se sa koka bërthamore mund të ketë secili shtet. Pas bisedimeve të muajit qershor, i dërguari i posaçëm presidencial për kontrollin e armëve, Marshall Billingslea, pati thënë në një konferencë për media se ai dhe zëvendësministri i Jashtëm rus, Sergei Ryabkov, kanë arritur mjaftueshëm përparim, si dhe janë pajtuar për të krijuar disa grupe punuese teknike, teksa synojnë të zëvendësojnë marrëveshjen e vitit 2010, para se të skadojë në shkurt të vitit të ardhshëm.