Një anije e mbytur e Marinës Suedeze, e shekullit të 17-të, e fundosur nën ujërat pranë Stokholmit prej 400 vjetësh, është shfaqur papritur për shkak të niveleve jashtëzakonisht të ulëta të Detit Baltik. Korniza prej druri e trupit të anijes, e ruajtur mirë, ka dalë mbi sipërfaqen e ujit që nga fillimi i shkurtit, pranë ishullit Kastellholmen, duke dhënë një pamje të qartë të saj. "Kemi një anije të mbytur këtu, e cila u fundos qëllimisht nga Marina Suedeze", tha për AFP-në Jim Hansson, një arkeolog detar në Muzeun e Stokholmit. Hansson tha se ekspertët besojnë se pasi shërbeu në marinë, anija u fundos rreth vitit 1640 për t'u përdorur si themel për një urë të re për në ishullin Kastellholmen. Arkeologët ende nuk e kanë identifikuar saktësisht anijen, pasi ajo është një nga pesë anije të mbytura, të rreshtuara në të njëjtën zonë për të formuar urën, dhe që të gjitha datojnë nga fundi i shekullit të 16-të dhe fillimi i shekullit të 17-të. "Kjo është një zgjidhje, në vend që të përdornin dru të ri, menduan të përdorin vetë trupin e anijeve që është prej lisi", për të ndërtuar urën, tha Hansson. Pjesë të anijes kishin dalë tashmë në sipërfaqe edhe në vitin 2013, por kurrë më parë ajo nuk ka qenë kaq e dukshme sa tani, pasi ujërat e Detit Baltik kanë arritur nivelin e tyre më të ulët në rreth 100 vjet, sipas arkeologut. Një program kërkimor ka nisur tani për të identifikuar dhe datuar me saktësi numrin e anijeve të mbytura suedeze që ndodhen në fund të Baltikut.