Presidenti bajram Begaj deklaroi nga budapesti se Shqipëria ka mbështetjen e Hungarisë për anëtarësimin e plotë në Bashkimin Europian . Ai u takua me homologun hungarez Tamash Suljok me të cilin foli dhe për çështje të tjera të ndjeshme në ballkan dhe Europë. “Shpreha mirënjohje në takimin tonë ndaj Presidentit dhe Hungarisë mike për mbështetjen e fortë, të palëkundur dhe të pakushtëzuar që Hungaria jep për procesin e anëtarësimit të Shqipërisë dhe të gjithë Ballkanit Perëndimor në Bashkimin Evropian. Ndihma teknike dhe ekspertiza e ofruar nga Hungaria për institucionet shqiptare ka kontribuar në forcimin e administratës publike dhe në zbatimin e reformave të rëndësishme”. Gjatë takimit kokë më kokë me presidentin hungarez u bisedua për çështjet delikate në Ballkan dhe në Europë. Për sa i përket sigurisë, u shpreh angazhimi i përbashkët Shqipëri-Hungari si dy vende në NATO, për mbrojtjen kolektive dhe sigurinë Euroatlantike.