Më shumë amerikanë aplikuan për status refugjati në Kanada në gjysmën e parë të vitit 2025 sesa në të gjithë vitin 2024, dhe më shumë se në çdo vit tjetër që nga 2019-a, sipas të dhënave të publikuara nga Bordi i Imigracionit dhe Refugjatëve i Kanadasë. Pjesa e tyre në totalin e kërkesave për refugjatë, 245 nga rreth 55,000, është e vogël dhe pranimi i kërkesave për refugjatë nga SHBA-ja nga Kanadaja historikisht ka qenë i ulët. Azilkërkuesit nga vendet e tjera që kalojnë kufirin tokësor nga SHBA-ja kthehen mbrapsht sipas një marrëveshjeje dypalëshe me arsyetimin se ata duhet të aplikojnë për azil në vendin e parë "të sigurt" në të cilin kanë mbërritur. Vitin e kaluar 204 persona paraqitën kërkesa për refugjatë në Kanada me Shtetet e Bashkuara si vendin e tyre të persekutimit të supozuar. Kërkesat nga SHBA-ja u rritën gjithashtu gjatë administratës së parë të Donald Trump. Të dhënat nuk thonë pse janë bërë kërkesat. Tetë avokatë i thanë Reuters se po dëgjojnë nga më shumë amerikanë transgjinorë që duan të largohen. Presidenti amerikan Donald Trump, dhe Gjykata Supreme e SHBA-së kanë goditur të drejtat e personave transgjinorë, duke kufizuar aksesin në kujdesin që pohon gjininë, kush mund të shërbejë në ushtri, kush mund të përdorë tualetet dhe kush mund të luajë në disa sporte. Për të fituar azil, refugjatët duhet të bindin Bordin e Imigracionit dhe Refugjatëve të Kanadasë se askund në SHBA nuk ka një vend të sigurt për ta. Bordi së fundmi shtoi dokumente nga grupe të tilla si Human Rights Ëatch, të cilat shqyrtojnë trajtimin e personave LGBTQ nga SHBA-të, në paketën e tij të dokumentacionit që detajon kushtet e dhënies së statusit të refugjatit.