Administrata Tatimore reagoi pas videos të bërë virale në rrjet ku një inspektor i kërkonte faturën tatimore të rigonit një tregtareje fruta perimesh në Sarandë. Në njoftimin zyrtar sqarohet se tregtarët ambulantë nuk kanë detyrim të lëshojnë faturë apo dokumentacion tatimor. Sipas legjislacionit, të gjithë ata që janë të regjistruar si tregtarë ambulantë kanë vetëm detyrimin të jenë mbi moshën 16 vjeç, të jenë të vetëpunësuar dhe të mos punësojnë persona të tjerë, të tregtojnë në hapësira publike me leje të lëshuara nga bashkia përkatëse dhe të jenë të regjistruar si ambulantë pranë Drejtorisë Rajonale Tatimore. Gjithashtu tregtarët ambulantë duhet të paguajnë kontributet e sigurimeve shoqërore dhe shëndetësore, tarifën për zënien e hapësirës publike dhe taksat bashkiake të aplikueshme.