Kufoma e një shqiptari është gjetur në ishullin Paro të Greqisë, ndërsa mediat greke raportojnë se bëhet fjalë për një person të moshës rreth 35-45 vjeç. Kufoma u gjet nga disa alpinistë gjatë shëtitjes së tyre, të cilët më pas njoftuan menjëherë policinë dhe zjarrfikësit. Kufoma ishte me shkallë të lartë dekompozimi dhe u gjet në zonën e Agio Anargiron. Policia greke po vijon ekspertizën mjeko-ligjore për të përcaktuar nëse shqiptari është vrarë apo ka rënë nga ndonjë lartësi. Ndërkohë, identiteti i tij ende nuk dihet dhe autoritetet policore greke po kryejnë hetime të plota për rastin. Ata kanë nisur kërkimet kryesisht në zonën prej nga ka pasur denoncim për zhdukje të ndonjë personi, qoftë ky edhe shqiptar. Nga ana tjetër, po kryhen verifikime nëse ka pasur denoncime nga të afërm, apo shokë të viktimës si dhe po tentohet të zbardhet nëse shqiptari ka qenë apo jo me dokumente të rregullta në shtetin grek.