Kur Partia Socialiste ka mandatuar Taulant Ballën, Damian Gjiknurin dhe Elisa Spiropalin si negociatorë për t’u ulur me opozitën për emrin e Presidentit të ri, nuk ka ende asgjë zyrtare nga Partia Demokratike. Këtë të hënë 3 përfaqësuesit e PS janë parë në ambientet e Kryesisë, ndërkohë i pranishëm ka qenë edhe kreu i grupit parlamentar të Partisë Demokratike, Enkelejd Alibeaj, duke ngritur dyshime se po negociohet për Presidentin. Top News kontaktoi me kreu e grupit parlamentar demokrat Enkelejd Alibeaj, i cili mohoi kategorikisht të ketë zhvilluar takim. Nga ana tjetër, burime nga selia rozë i thanë Top News se është zhvilluar një takim informal mes 3 negociatorëve të PS dhe kreut të grup demokrat, ku në qendër të bisedimeve ka qenë zgjedhja e Presidentit, duke hedhur poshtë pretendimin e Alibeajt. Nga ana tjetër këtë të hënë në ambientet e Kryesisë së Kuvendit ka mbërritur edhe ambasadorja e Shteteve të Bashkuara të Amerikës, Yuri Kim, e cila ka zhvilluar një takim me kryetaren e Parlamentit, Lindita Nikolla. Në përfundim të këtij takimi që ka zgjatur rreth 30 minuta, ambasadorja nuk pranoi të prononcohej për mediet.