Çështja e investimit strategjik në Portin e Durrësit mbërriti në Bruksel. Enkelejd Alibeaj, në emër të grupit parlamentar të Partisë Demokratike, dërgoi një letër zyrtare në adresë të komisionerit të Bashkimit Europian Oliver Varhelyi dhe diplomates europiane, Christiane Hohmann. Në letër Alibeaj nënvizon se kontrata e qeverisë shqiptare me investitorët e huaj shkel Marrëveshjen e Stabilizim-Asociimit lidhur me parimet e konkurrencës së lire, duke ju referuar mungesës së garës për përzgjedhjen e investitorit strategjik. Përmes një postimi në facebook, Alibeaj e konsideroi ‘Jahtet Marina Durrës’, një projekt fantazëm. Një hall i madh e ka detyruar Edi Ramën të sulmojë të gjithë ata që janë kritikë dhe skeptikë për projektin fantazmë të portit të Durrësit. Një projekt që praktikisht u rrëmben shqiptarëve një nga pak pasuritë e mbetura publike dhe që iu dhurohet me një projekt qesharak të përzgjedhurve dhe klientëve të kryeministrit. Deri më sot qeveria dhe kryeministri kanë heshtur dhe grupi parlamentar i PD ka vendosur që shqetësimin e tij për portin e Durrësit t’ja bëjë prezent dhe Komisionit Europian.