SPAK ka vendosur të zgjasë me tre muaj afatet e hetimit për kryetarin e Bashkisë Shkodër, Benet Beci. Procedimi penal ndaj tij u regjistrua më 23 tetor 2024, për akuzën e shkeljes së barazisë në tendera dhe ankande publike, kryer në bashkëpunim. Më 23 prill 2025, SPAK e mori zyrtarisht të pandehur kryebashkiakun socialist. Beci akuzohet për shpërdorim detyre në kohën kur drejtonte Korporatën Elektroenergjetike Shqiptare në lidhje me një tender të vitit 2019 me vlerë 700 mijë euro, që kishte si objekt një projekt kërkimor për zhvillimin strategjik të sektorit energjetik. Hetimet për këtë rast nisën pas zbërthimit të telefonit të ish-drejtorit të Autoritetit Rrugor Shqiptar Evis Berberi ku u zbuluan biseda kompromentuese që lidhen me abuzimet në tender. Përveç Becit, nën hetim janë marrë edhe disa zyrtarë të tjerë që kanë qenë pjesë e Komisionit të Vlerësimit të Ofertave në atë kohë.