Prokurori i Përgjithshëm i Shteteve të Bashkuara, William Barr lejoi nisjen e një hetimi mbi pretendimet për parregullsi në zgjedhjet presidenciale, lëvizje kjo që nxiti një zyrtar të lartë të departamentit të Drejtësisë të japë dorëheqjen. Barr theksoi se verifikimet do të bëhen vetëm për pretendime që duken bindëse. Të tilla hetime normalisht duhen ndërmarrë nga secili shtet më vete, por për prokurorin e përgjithshëm ky nuk është një rregull i detyrueshëm. Një ditë më parë, presidenti i zgjedhur i Shteteve të Bashkuara, Joe Biden nisi punën me njoftimin e task forcës së tij kundër Covid-19, një grup i përbërë nga mjekë dhe ekspertë të shëndetësisë, duke treguar kështu se synon të adoptojë një qasje të mbështetur te shkenca në përpjekjet për ta vënë në fre pandeminë, të cilët e konsideron prioritetin e vet. Por kjo ndodh në kohën kur presidenti republikan Donald Trump ende nuk e ka pranuar humbjen. Beteja ligjore, sipas zëdhënëses së tij Kaleyigh McEnany sapo ka filluar. “Zgjedhjet nuk kanë përfunduar ende”, tha ajo në një konferencë për shtyp, ku lëshoi një sërë akuzash për manipulime pa dhënë sërish prova të një mashtrimi sistemATIK, i cili të mund të ketë ndikuar rezultatin. CbsNews thotë se edhe ekipi i Bidenit po merr në konsideratë veprimet ligjore nëse Trump vazhdon të bllokojë kalimin e pushtetit. Reporterët e Shtëpisë së Bardhë thonë se pavarësisht kundërshtimeve të tij, Donald Trump pritet që ta lërë zyrën në janar dhe se ka ndërmend të kandidojë sërish për president në vitin 2024.