Kryeministri Edi Rama ka reaguar pas situate së krijuar në Kuvend dhe akuzave të opozitës për mungesën e tij. Nëpërmjet një deklerate për shtyp, të shpërndarë nga zyra e kryeministrit, theksohet se akuzat ndaj zyrtarit të lartë të FBI-së, McGonigal, nuk kanë lidhje me të dhe se kjo situate është sqaruar. “Ky mal i madh mbarsur me fantazi dhe ligësi, do të pjellë edhe më pak se një mi. Fatmirësisht gjithçka është e hetuar në SHBA dhe konkluzioni i hetimit s’ka asnjë lidhje me mua a me qeverinë shqiptare. Paratë e marra prej rusëve nga PD nuk janë shpikje, po fakt po ashtu i hetuar dhe i provuar botërisht.”, shprehet Rama. Sipas kryeministrit, “Në këtë çështje zyrtari i lartë i FBI nuk akuzohet fare për asgjë nga këto që fliten me ulërima në Shqipëri, po vetëm për konflikt interesi në marrjen e borxhit nga miku i vet shqiptaro-amerikan dhe mosdeklarim të tij”. Numri një I qeverisë shqiptare I konsideron qesharake akuzat për kompanitë në të cilat ka qenë aksioner një rus, pasi sipas tij “Kompania Strabag është flamuri më i madh i ekonomisë austriake, e cila ashtu si edhe kompania Trema operojnë në Shqipëri prej dekadash”. Rama shton se “Të lidhësh një aksioner rus të këtyre kompanive (i cili së fundmi është përjashtuar prej tyre si një individ nën sanksionet e luftës) me këtë përrallë që edhe pa të është krejt groteske, do të thotë të jesh në dëshpërim total”. Ai thekson se ato që duhen hetuar janë Gërdeci e 21 janari e lidhjet e opozitës me Rusinë.