Policia thotë se ka goditur një grup të strukturuar kriminal në kuadër të operacionit ‘Knock out 3’, të ndërmarrë në Vlorë, ku në pranga përfundoi 51-vjeçari Petrit Ndoji dhe u sekuestruan 4 mina me telekomandë me eksploziv C4 të programuara për shpërthim në distancë. Shërbimet e Policisë, në rrugën “Gjergj Kastrioti”, ndaluan automjetin tip “Ford Fiesta”, që drejtonte i arrestuari. Gjatë kontrollit të imtësishëm, në kroskotin e këtij automjeti, u gjetën dhe sekuestruan me cilësinë e provës materiale, 4 mina me telekomandë të pajisura me aparat celular dhe me kapsolla detonatore, të cilat dyshohet se do të përdoreshin për kryerjen e veprave kriminale në qytetin e Vlorës.