Një 33-vjeçar në Tiranë u arrestua pasi kreu manovra të rrezikshme me mjetin e tij e madje edhe aksidentoi një punonjës policie. Sipas uniformave blu, Marlin Ymeraj, 33 vjeç ka aksidentuar një punonjës policie dhe ka përplasur edhe dy mjete të shërbimeve të policisë. Gjithcka ka ndodhur në orën 3 të mëngjesit pas telefonatave nga qytetarët se një mjet tip Benz, po xhironte gomat dhe po kryente manovra të rrezikshme. Në adresën e dhënë kanë shkuar menjëherë efektivët e policisë dhe kanë kërkuar ndalimin e mjetit. Por 33 vjecari, sapo ka parë policinë, ka shtuar shpejtësinë duke mos iu bindur urdhërit për të ndaluar. Është dashur ndërhyrja edhe e forcës së posacme shqiponja dhe shërbimeve të tjera për ti bllokuar rrugën automjetit në bulevardin Gjergj Fishta, me qëllim që ta ndalte atë. por drejtuesi i mjetit nuk është bindur sërish duke aksidentuar një efektiv të shqiponjave dhe duke goditur mjetet e policisë. Sipas njoftimit, punonjësi i aksidentuar është në spital pasi ka marrë dëmtime të rënda në gjymtyrë. Në përfundim, 33 vjecari që kishte edhe precedentë të mëparshëm penal, ka përfunduar në pranga. Policia ka bërë të ditur ndërkohë se ai ishte ndëshkuar administrativisht edhe tre herë të tjera brenda 10 ditëve për manovra të rrezikshme dhe gara shpejtësie në qendra të banuara.