Larjet e hesapeve për pazaret e drogës apo për vrasjet në të shkuarën e kanë kthyer aksin rrugor Fushë Krujë-Laç dhe Milot-Lezhë, në një fushë betejë, ku bandat kriminale kanë gjetur si mënyrë për larjen e hesapeve, ekzektutimin me armë zjarri apo atentatet me tritol. Dy nga ngjarjet më të fundit, të ndodhura pikërisht në këtë aks rrugor, prodhuan 4 viktima dhe një person të plagosur rëndë, i cili po lufton për jetën në spitalin e Traumës në Tiranë. Njëra ngjarje u shënua më datë 17 korrik në vendin e quajtur mbikalimi i Fushë Krujës. Diklen Vata, Brilant Martinaj dhe Besmir Hoxha mbetën viktima të atentatit mafioz, ku drejt makinës së tyre tip Volksëagen Passat u derdhën 60 plumba nga tre persona ende të paidentifikuar nga policia e shtetit. Dy prej të rinjve, Diklen Vata dhe Brilant Martinaj ishin persona me precedentë kriminalë në fushën e krimeve ndaj personit dhe kishin njohje të afërt me Ervis Martinajn. Pa kaluar 1 javë, një tjetër atentat tronditi vendin. Këtë herë, ngjarja u regjistrua në Milot. Tre persona ngritën atentat ndaj Ylli Brahimit dhe Klisman Precit, duke i lënë të dy të plagosur rëndë. Preci humbi jetën në spitalin e Traumës, për shkak të plagëve të marra në trup, ndërsa Brahimi vijon të jetë i shtruar në të njëjtin spital dhe ndodhet në gjendje të rëndë shëndetësore. Këta të dy, po ashtu ishin me precedentë të mëparshëm kriminal dhe kjo është hera e dytë që ndaj tyre është kryer një atentat.