Rusia ka akuzuar Kazakistanin se po injoron aktivitetet rusofobike duke ngritur frikën se Kremlini mund t’i kthehet këtij vendi pasi të ‘mbyllë hesapet’ me Ukrainën. Igor Krasnov, kryeprokuror i Rusisë, tha se aktivistët ukrainas në Kazakistan po ndihmonin në ndezjen e ndjenjave anti ruse. “Unë rregullisht informohem se me mbështetjen e organizatave jo qeveritare ukrainas, aktivitete rusofobike zhvillohen në Kazakistan”, tha Krasnov gjatë bisedimeve me homologët e tij kazakë në Minsk ku u takuan kryeprokurorët e ish republikave sovjetike. Kremlini përdori pretekstin e mbrojtjes së rusëve etnikë të margjinalizuar për të justifikuar luftën e tij në Ukrainë dhe në prill, gjeneralët rusë thanë se ushtritë e tyre duhej të shkonin deri përtej kufirit me Moldavinë, ku pretendohet po ashtu se rusët diskriminohen.