9 persona kanë vdekur pasi një avion u rrëzua pranë qytetit Orebro në Suedi. Mediat suedeze raportojnë se në avionin e vogël ndodheshin 8 parashutistë dhe piloti. Mësohet se avioni është rrëzuar vetëm pak sekonda pasi ishte ngritur. Ekuipazhi gjeti menjëherë vdekjen kur aeroplani u rrëzua afër pistës në aeroportin e Orebro, rreth 160 kilometra në perëndim të Stokholmit. Rrëzimi mendohet të ketë ndodhur ndërsa avioni po ngrihej. “Ishte një aksident tepër i rëndë”, tha policia në një deklaratë për mediat. Kryeministri i vendit, Stefan Lofven, ofroi ngushëllimet e tij për familjarët. “Me gjithë trishtimin dhe pikëllimin e madh, kam marrë informacionin tragjik në lidhje me rrëzimin e avionit në Orebro”, shkroi ai në Twitter. Në një incident të ngjashëm në 2019-ën, nëntë njerëz vdiqën kur një aeroplan u rrëzua në veri të vendit pas ngritjes. Hetimi i rrëzimit tregoi se avioni ishte ngarkuar në mënyrë të papërshtatshme.