Një kompani ruse tha se ofron pesë milionë rubla, ose 72.000 dollarë, për ushtarët e parë që shkatërrojnë ose kapin tanket e prodhimit perëndimor në Ukrainë. Pas vendimit të perëndimit për dërgimin e tankeve moderne në Kiev, Kremlini tha se forcat ruse do ti djegin të gjithë ata. SHBA, Gjermania dhe disa vende të tjera evropiane, kanë premtuar se do ti dërgojnë Ukrainës dhjetëra tanke të avancuara luftarake gjatë muajve të ardhshëm për të ndihmuar në rritjen e kapacitetit ushtarak të vendit, ndërkohë që lufta po hyn në muajin e 12-të. Vendimi i aleatëve të Kievit është kritikuar nga Kremlini si një përshkallëzim i rrezikshëm dhe zëdhënësi Dmitry Peskov tha se tanket do të "digjen" në vijën e frontit. Tani një kompani ruse - Fores, me bazë në Urale, e cila prodhon mjete për industrinë e energjisë - po ofron pagesa në para për ushtarakët rusë që "kapin ose shkatërrojnë" tanket Leopard 2 të prodhimit gjerman ose Abrams të prodhimit amerikan. Kompania tha se do t'i paguajë pesë milionë rubla ose 72.000 dollarë, ushtarit të parë rus që shkatërron tankun e parë dhe nga 500.000 rubla, ose 7.200 dollarë, për të gjitha rastet e mëvonshme. Autoritetet ukrainase kanë thënë vazhdimisht se atyre u nevojiten 300 tanke ndërsa përpiqen të dëbojnë forcat ruse nga territori i tyre.