Në përpjekje për të tërhequr votën e emigrantëve që jetojnë dhe punojnë prej vitesh në Greqi, partitë opozitare greke kanë përfshirë në listat e kandidatëve edhe të huaj. Duke qenë se shqiptarët janë komuniteti më i madh i huaj që ka marrë shtetësinë greke, rrjedhimisht edhe të drejtën për të votuar ata përbëjnë edhe numrin më të madh të të huajve që kandidojnë. Janë plot shtatë të tillë, që kandidojnë që të gjithë për partitë e majta greke. Dy emra kandidojnë për PASOK-un, Fatos Malaj në Athinë dhe dhe Niko Bilika në Selanik. Tre të tjerë kandidojnë me Sirizan. Adiljan Koxhaxh dhe Makrina Koçi në Selanik dhe Angjelos Jahollari në Evia. Sidorela Karthi garon me Partinë Komuniste në Kretë, ndërsa Paty Vardhami është në listën e nismës Mera 25. Pesë prej kandidatëve nga komuniteti shqiptar janë të rinj të talentuar nga brezi i dytë i emigrantëve që janë arsimuar në Greqi, apo vende të tjera perëndimore dhe janë përfshirë në jetën politike greke duke qenë edhe pjesë e debateve dhe përfaqësimeve në median greke. Në Greqi janë gati 116 mijë shqiptar që kanë marrë shtetësinë greke dhe nga këta 87 mijë janë me të drejtë votë në zgjedhjet e 21 majit.