Data 9 shkurt është afati i fundit për regjistrimin e kandidatëve në Komisonin Shtetëror të Zgjedhjeve, për zgjedhjet e pjesshme lokale në 6 bashkitë pa kryetar. Teksa kryesia e degës së Durrësit ka propozuar si kandidat Luan Hotin dhe ajo e Rrogozhinës Ferdinand Saraçin dhe pritet miratimi i tyre në Kryesinë qendrore, ende nuk ka një konfirmim të propozimeve për 4 bashkitë e tjera. Burime bëjnë me dije se 4 emrat më të përfolur janë përkatësisht, Xhemal Bushati për Shkodrën, i cili është ish-kryetar i Këshillit Bashkiak; Naim Gazidede për Dibrën, i cili mban postin e kryetarit të PD për këtë degë; ish-kryetari i Bashkisë Vorë, Fiqiri Ismaili, është një emër i përfolur dhe mund të ketë një rikthim të mundshëm; Indrit Sefa po ashtu është një nga zyrtarët e Partisë Demokratike që përflitet se mund të jetë kandidat për Bashkinë e Lushnjës.