24-vjeçari Klevis Hoxha u rrëmbye në qytetin e Burrelit, u ekzekutua për gjakmarrje dhe trupi i pajetë iu hodh në fshatin Shpërdhet të Kurbinit për 50 mijë euro. Njoftimi zyrtar i SPAK në lidhje me ngjarjen e pesë viteve më parë zbulon se i dyshuari kryesor për ekzekutimin është shtetasi Sabah Nuzi, 31 vjeç, i arrestuar tashmë. Sipas SPAK, Nuzi e kreu vrasjen me porosi të Aurel Hoxhës, njohur edhe me emrin Aurelinjo Kolaveri, që Prokuroria e Posaçme thotë se kishte ngritur dhe drejtonte një grup të strukturuar kriminal për trafikun e drogës nga Amerika Latine drejt Europës dhe Shqipërisë. Në dosjen e SPAK thuhet vrasja e Klevis Lleshit për gjakmarrje, pasi xhaxhai i këtij të fundit, shtetasi Arben Lleshi kishte vrarë dhe djegur në vitin 2012 në Angli vëllain e Aurel Hoxhës, Agimin. SPAK thotë se i arrestuari tjetër në këtë dosje, shtetasi Samet Loka është prangosur si pjesë e grupit kriminal të Aurel Hoxhës, por që nuk ka lidhje me vrasjen e Klevis Lleshit. Ndërkohë, personi i katërt për të cilin SPAK nxorri urdhër arrest, shtetasi Sajmir Kolaveri është arrestuar në Itali, po si pjesë e grupit të trafikut të drogës të Aurel Hoxhës.