Në kuadër të operacioneve të vazhdueshme për kapjen e personave të shpallur në kërkim, policia e Tiranës ka ndaluar pesë persona brenda 24 orëve të fundit, të dënuar apo të akuzuar për vepra të ndryshme penale. Specialistët për Hetimin e Trafiqeve të Paligjshme arrestuan një 70 vjeçar, i cili ishte dënuar nga Gjykata e Tiranës për vjedhje duke shpërdoruar detyrën, veprime në kundërshtim me vendimin e gjykatës, dhe shpërdorim detyre. Policia e Komisariatit Nr. 1 ndaloi një tjetër person, i dënuar me 1 vit burg nga Gjykata e Apelit për mashtrim. Sakaq në një operacion të përbashkët të Komisariateve Nr. 2 dhe Nr. 3, u ndalua një tjetër person, i dënuar për prodhim, mbajtje, blerje apo shitje pa leje të armëve të ftohta. Po ashtu, në bashkëpunim me Seksionin e Kërkimit, u arrestua 62 vjeçari, i dënuar me 4 muaj burg për ndërtim të paligjshëm. Ndërkohë, Komisariati Nr. 6 në bashkëpunim me Komisariatin Nr. 5 arrestoi 34 vjeçar, i shpallur në kërkim për mashtrim.