Shumë shqiptarë të skeduar në ‘listën e zezë’ të krimeve në Shqipëri, në shumë raste kanë gjetur strehë në Itali. Por, marrëveshjet mes dy vendeve, tashmë kanë shuar shpresat e çdo shqiptari, që përjetësisht të mbetet i lirë. Rasti më i fundit është ai i Ferdinand Ndojës, që lëvizte i lirë në Itali ndonëse kërkohej nga shteti shqiptar. Por, arratia e tij zgjati deri pak ditë më parë. Gjatë një kontrolli rastësor të Policisë italiane në Varese u zbulua se 44-vjeçari kërkohej në Shqipëri për plagosjen e një personi në vitin 2021, ndaj ai u arrestua dhe po pret ekstradimin drejt vendit tone, procedura që sipas burimeve për Top News, tashmë kanë nisur. Italia është një nga shtetet, ku në fakt zgjedhin të strehohen shumë shqiptarë me precedent penalë, për shkak të afërsisë gjeografike mes dy vendeve, por edhe mundësisë më të shpejtë për t’u larguar në rrugë tokësore, detare, apo ajrore.