Katër ligje të paketës penitenciare dhe që janë hartuar nga ekspertë të caktuar nga Ambasada Britanike janë dekretuar nga presidenti Ilir Meta. Bëhet fjalë për ligjet: organizimin dhe funksionin e shërbimit të provës, ekzekutimin e vendimeve penale dhe policinë e burgjeve, si dhe për të drejtat dhe trajtimin e të dënuarve dhe të paraburgosurve. Në ligjin për shërbimin e provës, meta vë në dukje se ky Shërbim ka marrë vëmendjen e nevojshme nga ligjvënësi, duke normuar në nivel ligji veprimtarinë e Institucionit të Shërbimit të Provës që duhet të forcojë kapacitetet e tij dhe të kontribuojë në mbrojtjen e interesit publik përmes zbatimit transparent të programeve që synojnë: rehabilitimin dhe riintegrimin shoqëror të personave nën mbikqyrje, parandalimin e veprave penale dhe uljen e rrezikut të përsëritjes së tyre. Në ligjin “për ekzekutimin e vendimeve penale” presidenti argumenton se ky ligj ka plotësuar rregullat dhe procedurat për mënyrën e ekzekutimit të vendimeve penale, duke i unifikuar ato, në raport me amendimet e vazhdueshme që kishte pësuar ligji ndër vite, si dhe duke e përshtatur me ndryshimet ligjore, veçanërisht pas hyrjes në fuqi të Kodit të Drejtësisë Penale për të Mitur.