Kombet e Bashkuara u kanë kërkuar donatorëve që gjatë këtij viti të japin 4.2 miliardë dollarë ndihmë humanitare për ukrainasit në vendin e shkatërruar nga lufta dhe për ata që janë larguar prej tij, ndërkohë qëpushtimi i paprovokuar rus i Ukrainës po i afrohet përvjetorit të dytë. Mbi 14.6 milionë ukrainas brenda vendit, apo 40 për qind e popullsisë së përgjithshme, kanë nevojë për ndihmë humanitare gjatë këtij viti, tha zyra për Koordinim të Çështjeve Humanitare. Lufta po ashtu ka detyruar rreth 6.3 milionë ukrainas që të kërkojnë strehim jashtë vendit, ndërkaq në fund të vitit 2023, 5.9 milionë refugjatë ishin strehuar në Evropë, tha Zyra përmes një njoftimi. “Qindra mijëra fëmijë jetojnë në komunitetet në frontet e luftës, të tmerruar, traumatizuar dhe pa nevojat elementare. Vetëm ky fakt na nxit që të bëjmë gjithçka që të dërgojmë më shumë ndihmë humanitare për Ukrainën”, tha shefi i Zyrë spër koordinim të cështjeve humanitare, Martin Griffiths. Që nga fillimi i këtij viti, Ukraina po përballet me një fushatë intensive të sulmeve ajrore ruse, duke vështirësuar edhe më shumë jetën e civilëve.