Zanafilla e shpërthimit me 30 kilogram tritol ndaj hotelit Bizant në Sarandë daton që prej vitit 2002, kur tre bashkëpronarët e tij kanë nisur një proces gjyqësor për çështje pronësie. Hoteli zotërohej nga një minoritar grek me emrin Dhimitër Evangjeliu dhe dy shqiptarët Spiro Çabiri dhe Vangjel Shtuka. Ky i fundit është ndarë nga jeta. 90 për qind e pronësisë, sipas të dhënave në ekstraktin historik të QKB-së i takon grekut Dhimitër Evangjeliu dhe nga 5 për qind dy shqiptarëve Çabiri e Shtuka. Shtuka përfaqësohej në proceset gjyqësore për pronësinë e hotelit nga djemtë e tij. Dy shqiptarët kanë refuzuar ofertën për të shitur aksionet e tyre me shifrën 46 mijë euro secili, ose 10 për qind e vlerës prej 920 mijë eurosh që është vlerësuar objekti. Ata janë shprehur se kanë investuar dy herë më shumë për këtë hotel, ndërsa kanë kërkuar nga autoritetet që ta rivlerësojnë objektin.