Një person ka humbur jetën gjatë një aksidenti në të cilin janë përfshirë qindra makina, në kinën qendrore me pamjet që tregonin skena kaosi. Imazhet ajrore tregonin qindra makina pasagjerësh, furgonë dhe kamionë, shumë prej të cilëve të përplasur me njëri tjetrin, të mbledhur në një pjesë të autostradës në kushtet e një mjegulle të dendur. Të tjera imazhe virale të postuara online, tregonin mbetjet e disa makinave të përplasura. Aksidenti ndodhi për shkak të shikueshmërisë së dobët si pasojë e mjegullës në qytetin Zhengzhou të provincës së Henanit dhe në të u përfshinë 200 makina – sipas medias shtetërore. “Mëngjesin e të mërkurës, një mjegull e dendur mbuloi papritur urën e lumit të verdhë në Zhengzhou, cka shkaktoi një aksident trafiku që përfshiu shumë makina”, tha televizioni kinez CCTV duke shtuar se një person kishte humbur jetën. Përpjekjet e skuadrave të shpëtimit nisën menjëherë pas raportimit të aksidentit dhe segmenti i rrugës po pastrohet që të rikthehet trafiku normal. Aksidentet rrugore janë të zakonshme në Kinë për shkak të mungesës së kontrolleve strikte të sigurisë. Në shtator të këtij viti 27 pasagjerë humbën jetën pasi një autobus që i transportonte ata drejt një pike karantine në provincën Guizhou u përmbys në një autostradë.