Policia e Korçës ka arrestuar dy të rinj nga Tirana për trafikim të 16 emigrantëve të paligjshëm. 26 vjeçari banues në Tiranë, është kapur nga shërbimet e policisë në aksin rrugor Bilisht-Korçë, në afërsi të fshatit Cangonj, duke transportuar me mjetin furgon tip "Citroen" që e drejtonte pa leje drejtimi 16 emigrantë të paligjshëm të cilëve kundrejt fitimit iu kishte premtuar kalimin drejt vendeve të BE-së. Në vijim të veprimeve hetimore të kryera policia e Korçës ka bërë ndalimin edhe të një 27 vjeçari, banues në Tiranë, i dyshuar si i implikuar në këtë ngjarje. Arrestimi I dy të rinjve është bërë në kuadër të operacionit ‘Perimetri’, I cili po vazhdon prej disa muajsh në zonën kufitare me Greqinë për ndalimin e trafikimit të emigrantëve të paligjshëm nga Lindja e Mesme drejt vendeve të BE. Nga ky operacion u arrestua në korrik edhe Orion Bali, që më pas tentativa e tij për të dalë nga qelitë solli edhe akuzat për korrupsion ndaj gjyqtares Mimoza Margjeka dhe bashkëshortit të saj Arben Cara që morën 6 mijë euro nga familjarët e Balit.