Gjatë orëve të fundit janë regjistruar 19 vatra zjarri në të gjithë vendin, nga të cilat tre mbeten ende aktive, të cilat janë të përqendruara në malin mbi fshatin Dhivër në Finiq, ku zjarri ka përfshirë një sipërfaqe pyjore në zonë të thellë malore. E ngjashme paraqitet situata në fshatin Lofkënd në Mallakastër. Zjarri ka përfshirë një zonë me pisha. Sakaq në fshatin Vjollcë në Mirditë, vatra e zjarrit ka përfshirë një zonë pyjore me pisha dhe shkurre. Ndërhyrjet e shërbimit zjarrfikës, shërbimit pyjor dhe vullnetarëve kanë vijuar deri në orët e vona, por vatra mbetet ende aktive. Në të gjitha operacionet për shuarjen e zjarreve janë angazhuar gjithsej 48 automjete zjarrfikëse dhe 445 forca operacionale, përfshirë 9 mjete të rënda, 73 efektivë të Forcave të Armatosura, 8 automjete të tjera me ekuipazh, mbështetje nga ajri dhe dy avionë suedezë në kuadër të Mekanizmit Evropian të Mbrojtjes Civile.