Një 15-vjeçar është goditur me thikë në pjesën e qafës nga një 13 vjeçar, pas një zënke për motive banale në një shkollë private në qytetin e Sarandës. Ngjarja ka ndodhur paraditen e së mërkurës, kur dy adoleshentët ishin duke hyrë në ambientet e shkollës për të vijuar si normalisht mësimet. Por, në hyrje ka lindur një debat mes tyre se kush do të hynte i pari. Përplasja me fjalë mes adoleshentëve ka përfunduar në përplasje fizike. Burimet pohojnë se 13 vjeçar ka nxjerrë një thikë me të cilën ka goditur 15-vjeçarin në pjesën e qafës. Viktima është shoqëruar menjëherë në Spitalin e Sarandës për të marrë mjekim dhe fatmirësisht mjekët pohojnë se është jashtë rrezikut për jetën. Ndërkohë, në lidhje me ngjarjen policia është duke hetuar edhe përgjegjësitë e institucionit arsimor mbi sigurinë në ambientet e brendshme të saj.