Në Gjermani të gjitha stacionet kryesore të trenave janë pajisur tani me teknologji moderne të kamerave vëzhguese për të rritur sigurinë. Hekurudha Gjermane, Deutsche Bahn, dhe Ministria Federale e Brendshme në Berlin, bënë të ditur, se është zbatuar një program i zhvilluar teknologjik për vëzhgimin përmes pamjeve video. Në rreth 750 stacione treni në Gjermani janë në funksionim gjithsej 11.000 kamera. Numri i tyre pothuajse është dyfishuar që nga viti 2012. Ky projekt u mbështet me 180 milionë euro nga qeveria federale. Sipas Deutsche Bahn, falë teknologjisë së re, policia federale tashmë ka trefishuar numrin e zbardhjes së krimeve në krahasim me vitin 2019. "Në këtë mënyrë, ne rrisim sigurinë e udhëtarëve dhe mbrojtjen e infrastrukturës kritike hekurudhore," tha Ministrja Federale e Brendshme, Nancy Faeser. Kamerat moderne, sipas drejtuesve të hekurudhës, mundësojnë një pamje të përgjithshme të stacioneve nga mbi 30,000 kënde të ndryshme. Ato po ashtu mbështesin policinë federale "në mënyrë efektive në luftimin e krimit". Policia Federale dhe Deutsche Bahn po testojnë së bashku efektivitetin e prezencës personale të forcave të sigurisë dhe teknologjisë e koncepteve të reja. Por problemi shumë më i madh për Hekurudhën Gjermane, Deutsche Bahn është infrastruktura e vjetëruar, shinat, teknologjia e sinjalizimit, urat dhe tunelet. Si rezultat, shumë trena në distanca të gjata në Gjermani tani arrijnë me vonesë në destinacionin e tyre. Për këtë arsye, qeveria është nën presion që të rrisë financimin për hekurudhat, por kjo nuk mund të pritet deri pas zgjedhjeve federale të shkurtit.