Rreth 95 persona rezultojnë ende të zhdukur pas sulmit të javës së kaluar në afërsi të Moskës, kur persona të armatosur hapën zjarr mbi pjesëmarrësit në një koncert dhe i vunë flakën sallës. Numri zyrtar nga sulmi në Crocus City Hall është 140 të vdekur dhe 182 të plagosur. Por shërbimi i lajmeve Baza, i cili ka kontakte të mira në sigurinë ruse dhe organet e zbatimin e ligjit, tha se 95 persona të tjerë figurojnë në listat e përpiluara nga shërbimet e urgjencës bazuar në apelet e njerëzve për të afërmit e humbur. “Këto lista përfshijnë persona me të cilët të afërmit nuk kanë mundur të kontaktojnë që nga sulmi terrorist, por që nuk janë në listat e të plagosurve dhe të vdekurve”, tha Baza. "Disa nga këta njerëz mund të kenë vdekur por nuk janë identifikuar ende". Hetuesit rusë thanë se sulmi u krye nga katër sulmues duke përdorur armë automatike kallashnikov. Më shumë se 500 fishekë u gjetën në vendngjarje. Sulmi nisi pak para se grupi i rock-ut të epokës sovjetike "Picnic" të dilte në skenë për të performuar para 6200 personave në sallë.