Orges Shehi festoi 100 ndeshje në Kategorinë Superiore si trajner i Tiranës. Arritja e veçantë e teknikut bardheblu nuk i shpeëtoi syut të mediave por as lojtarëve që drejtohen nga ai në klubin 25 herë kampion të Shqipërisë. Futbollistët bardheblu, në një nga seancat e fundit stërvitore në prag të përballjes ndaj Partizanit i kanë bërë një surprizë të veçantë 44 vjeçarit. Në shenjë falenderimi për kontributin e dhënë dhe frymën pozitive që ka sjellë në klub, lojtarët dhe stafi i dhuruan teknikut një fanellë me numrin 100 të firmosur nga të gjithë si një simbolikë për arritjet e deri më tanishme. Deri në këtë pikë të sezonit, Tirana pozicionohet në vendin e parë në renditje, 3 më shumë se Kukësi dhe futet në klimën e derbit të kryeqytetit që do të zhvillohet të enjten në 'Air Albania' në orën 19:45 në një gjendje fantastike nga ana morale. Statistikat e Shehit si trajner janë mjaft pozitive ku në 100 ndeshje ka fituar 57, ka barazuar 15 dhe ka humbur 28. Skuadrat e tij kanë shënuar në total 168 gola dhe kanë pesuar vetëm 87 teksa nën drejtimin e Skëndërbeut, Kukësit dhe Tiranës në kampionat ka grumbulluar në total 186 pikë.