Presidenti amerikan Donald Trump, ka kërkuar të paktën 100 miliardë dollarë shpenzime të industrisë së naftës për Venezuelën, por mori një përgjigje të vakët në Shtëpinë e Bardhë, pasi një drejtues paralajmëroi se vendi i Amerikës së Jugut ishte aktualisht "i painvesueshëm". Shefat e kompanive më të mëdha amerikane të naftës që morën pjesë në një takim në shtëpinë e bardhë pranuan se Venezuela, e vendosur mbi rezerva të mëdha energjie, përfaqësonte një mundësi joshëse. Por ata thanë se do të nevojiteshin ndryshime të rëndësishme për ta bërë rajonin një investim tërheqës. Nuk u ndërmorën ndërkohë menjëherë angazhime të mëdha financiare. Trump ka thënë se do të nxjerrë naftën e kombit të Amerikës së Jugut pasi forcat amerikane kapën udhëheqësin e saj, Nicolas Maduro, në një operacion më 3 janar në kryeqytetin e saj. "Një nga gjërat që Shtetet e Bashkuara përfitojnë nga kjo do të jenë çmime edhe më të ulëta të energjisë", tha Trump në takim. Por bosët e naftës të pranishëm shprehën pak interes. Drejtori ekzekutiv i Exxon, Darren Ëoods, tha: "Asetet tona janë sekuestruar atje dy herë dhe mund ta imagjinoni që rihyrja për herë të tretë do të kërkonte disa ndryshime mjaft të rëndësishme nga ajo që kemi parë historikisht dhe nga ajo që është aktualisht gjendja. Sot vendi është i painvesueshëm". Venezuela ka pasur një marrëdhënie të ndërlikuar me kompanitë ndërkombëtare të naftës që kur nafta u zbulua në territorin e saj më shumë se 100 vjet më parë. Chevron është kompania e fundit e madhe amerikane e naftës që ende operon në vend. Një numër i vogël kompanish nga vende të tjera, përfshirë Repsol të Spanjës dhe Eni të Italisë, të dyja të përfaqësuara në takimin e Shtëpisë së Bardhë, janë gjithashtu aktive. Trump tha se administrata e tij do të vendosë se cilat kompani do të lejohen të operojnë.