Policia ka risjellë në vëmendjen e qytetarëve shpërblimin prej 10 mijë euro që jep për nformacione për të kapur të shumëkërkuarin Talo Çela. Policia ka rishpërndarë në faqen zyrtare në rrjetin social facebook foton e Talo Çelës, si dhe njoftimin për dhënien informacion për të, ku rikujton se janë vënë në dispozicion 10 mijë euro për këdo që jep informacion për kapjen e të shumëkërkuarit. Policia rithekson se për çdo informacion që i shërben kapjes së Talo Çela, qytetarët të telefonojnë në numrin e celularit 069 41 06 823, si dhe në numrin pa pagesë 112 apo në Komisariatin Dixhital, duke iu garantuar anonimat të sigurt. 49-vjeçari Talo Çela akuzohet si një nga personat që ka marrë pjesë në grabitjen e Rinasit në prill të vitit 2019, si dhe dyshohet se fshihet pas atentatit me armë zjarri ku u vranë 2 vëllezërit Haxhia në Durrës. Sipas njoftimit të policisë Talo Çela është person i shpallur në kërkim kombëtar dhe ndërkombëtar, pasi Gjykata për Krimet e Renda Tiranë i ka caktuar masën e sigurisë “Arrest në burg”, për veprat penale “Vrasja e punonjësit të policisë” kryer në bashkëpunim, mbetur në tentativë, “Vjedhja me armë e kryer në bashkëpunim”, në kuadër të grupit të strukturuar kriminal dhe “Vrasja me paramendim, kryer në bashkëpunim”. Talo Çela veç problemeve që ka me ligjin ka pasur kohë e fundit edhe përplasje grupet e tjera kriminale, të cilët më 17 shtator I vranë vëllain Bujar Çela, në një kafe pranë rethrrotullimit të Bradaseshit në Elbasan. Po kështu pak kohë më parë Talo Çelës I kanë vënë tritol në vilën 2 katëshe që ai zotëron, pranë Elbasanit. Pavarësisht se po kërkohet edhe nga policia edhe nga bandat rivale deri më tani 49 vjeçari nuk ka lënë asnjë gjurmë, çka e ka detyruar policinë të rikërkojë ndihmën e qytetarëve.