Një zjarr i përmasave të mëdha ra mbrëmjen e të mërkurës në pyllin pranë uzinës së Poliçanit. Flakët u përhapën me shpejtësi dhe iu afruan zonës C të uzinës, në të cilën ndodhen magazinat me lëndë plasëse. Në vendngjarje mbërritën forca të shumta zjarrfikëse nga të gjitha zonat e Qarkut të Beratit, ndërsa kërkohet edhe ndërhyrja nga ajri. Situatën e vështirë me zjarrin po e ndjek nga afër edhe kryetari i Bashkisë, Adriatik Zotkaj, i cili bëri thirrje për ndihmë, për shkak të rrezikut nga shpërthimi i magazinave, që ndodhen vetëm 200 metra larg zonave të banuara. Po ashtu, një tjetër vatër masive përfshiu këtë pasdite pyllin me pisha mes fshatrave Gjinoqarë dhe Drenie të Fierit, ku flakët u përhapën në një sipërfaqe të konsiderueshme. Edhe në këto zona është kërkuar ndërhyrja nga ajri, pasi zjarri mund të përparojë drejt zonave të banuara, për shkak të erës së fortë. Autoritetet lokale dhe shërbimet zjarrfikëse vijojnë të monitorojnë situatën, por kërkohet edhe ndërhyrja nga ajri, pasi rreziku për përhapjen e flakëve drejt fshatrave përreth mbetet i lartë, për shkak edhe të erës së fortë. Një vatër zjarri është përhapur edhe në varrezat e fshatit Dhërmi, duke rrezikuar edhe ullishtet që ndodhen përreth zonës.