Këtë të diel në pesë bashki të vendit votohet për të zgjedhur pesë kryebashkiakë të rinj. Janë 334 mijë e 539 votues në bashkitë, Vlorë, Berat, Cërrik, Mat dhe Tepelenë me të drejtë vote dhe që kanë mundësi të shprehin vullnetin e tyre që prej orës 07:00 të mëngjesit të kësaj të diele kur do të hapen edhe qendrat e votimit, të cilat do të mbyllen në orën 18.00 sipas përcaktimit në kodin zgjedhor kure zgjedhjet mbahen nga 15 tetori deri më 15 nëntor. Përgjatë së shtunës komisioni Komisioni Qendror i Zgjedhjeve shpërndau Kutitë e votimit dhe materialet zgjedhore në të 8 KZAZ-të e ngritura në pesë bashki. Në Vlorë votojnë 171 mijë e 895 qytetarë, ndërsa në Tepelenë 12 mijë e 667 qytetarë. Në Mat ka 29 mijë e 92 votues, ndërsa në Cërrik numri i zgjedhësve është 38 mijë e 724. Në bashkinë e pestë ku ka zgjedhje Berati të drejtën e votës e kanë 82 mijë e 161 qytetarë. Në garën për zëvendësimin e 5 kryebashkiakëve të zgjedhur deputetë, apo ministër si në rastin e Andis Sallës së Cërrikut janë 13 kandidatë. Fushata e këtyre zgjedhjeve të pjesshme kaloi pa shumë zhurmë dhe as protagonizëm. Nuk pati mitingje dhe as takime elektorale ku të pranishëm të ishin liderët e partive kryesore. Ndryshe nga herë të tjera Partia Demokratike nuk kishte kandidatë të regjistruar nën siglën e saj apo ndonjë partie tjetër opozitare, ndonëse de fakto kanë shprehur mbështetjen për disa kandidatë të pavarur në këtë garë