Presidenti i Ukrainës, Volodymyr Zelensky, e bëri të qartë se nuk do të heqë dorë nga asnjë pjesë e territorit ukrainas në këmbim të “paqes” me Rusinë. Vetëm me Ukrainën mund të garantohet siguria e vendeve demokratike. Qëndrueshmëria e rendit ndërkombëtar varet pikërisht nga respektimi i kufijve dhe sovranitetit të shteteve. Komentet e kreut të shtetit ukrainas vijnë në kohën kur në arenën ndërkombëtare po shtohen zërat në mbështetjen të arritjes së një marrëveshjeje paqeje mes Kievit dhe Moskës përmes një kompromisi territorial. Vetë Donald Trump, e ka lënë së fundi të kuptohet se në një fazë të caktuar të luftës, Ukraina dhe Rusia mund të detyrohen të shkëmbejnë territore si pjesë e një zgjidhjeje përfundimtare. Zelensky megjithatë nuk e pranon këtë ide, duke e cilësuar si të të rrezikshme, jo vetëm për Ukrainën, por për të gjithë botën demokratike. Ndërkohë në terren, Rusia vazhdon të shënojë fitore, e së fundit, forcat e saj në lindje të Ukrainës kanë marrë nën kontroll dy fshatra në rajonin e Donjeckut, duke rritur presionin në fushëbetejë, teksa udhëheqësit botërorë po tentojnë që të arrihet një zgjidhje diplomatike për t’i dhënë fund konfliktit. Ushtria ruse po përparin në këtë rajon duke iu afruar vijës kyç të mbrojtjes të Kievit. Një ditë më parë, Trump i tha gazetarëve se do të marrë një vendim “të rëndësishëm” brenda dy javësh mbi përpjekjet për paqe në Ukrainë, duke përmendur mundësinë që Moska të përballet me sanksione të masive, ose ai tha se mund të “mos bëj asgjë”.