Ndryshku i mineraleve që mbulojnë sipërfaqen e planetit Mars përmban sasi të vogla uji, e kjo për shkencëtarët është shenja që dëshmon për një të kaluar të ftohtë dhe të lagësht të planetit të kuq. Ekspertët mendojnë se një e dhënë e tillë mund t’i ndihmojë ata që të kuptojnë gjithashtu se kur Marsi u tjetërsua, duke u kthyer në një shkretëtirë të mbuluar nga pluhuri i hekurit të oksiduar. Qindra anije hapësinore kanë studiuar planetin Mars për dekada me radhë. Hulumtuesit e kanë ditur prej vitesh se sipërfaqja e planetit, me peizazhet e liqeneve dhe lumenjve të tharë, lë të kuptohet për një kaluar kur uji i lëngshëm ishte i pranishëm, e sondat e dërguara atje kanë zbuluar depozita akulli disa kilometra poshtë sipërfaqes së poleve. Sonda Perseverance shpresohet të sjellë brenda dekadës së ardhshme kampione që mund të ndihmojnë për të mësuar më shumë rreth planetit që ka tërhequr gjithmonë vëmendjen e njerëzimit. Ekipi hulumtues thotë se përdori teknika të reja laboratorike për të treguar se ngjyra e kuqe e Marsit krijohet nga oksidet e hekurit që përmbajnë sasi të vogla uji. Studimi është publikuar kohët e fundit në revistën “Nature Communications”. Sipas tij, oksidi i hekurit formohet shpejt në praninë e ujit të ftohtë, çka lë të kuptohet se mund të jetë formuar kur planeti Mars kishte ende ujë në sipërfaqe. Rezultatet lënë të kuptohet se ndryshku i gjetur në Mars apo hekuri i oksiduar, nuk është dhe aq i ndryshëm nga fenomeni që shohim në Tokë.