Dy ish-punonjës policie në Lezhë dyshohet se bashkëpunuan me trafikantët dhe lejuan kultivimin e drogës. Serxhio Xhamalloti, 27-vjeç gjatë kohës që ushtronte detyrën në Patrullën e Përgjithshme së bashku me kolegun e tij 28-vjeçarin Klisman Nikolli nuk morën masa për të ndaluar kultivimin e kanabisit. Ata u zbuluan pas hetimeve 2-vjeçare të kryera nga ana e Agjencisë së Mbikëqyrjes Policore. Dy ish-efektivët akuzohen për “Shpërdorim detyre”, por agjentët gjatë aksionit të zhvilluar mundën të prangosnin vetëm Serxhio Xhamallotin ndërsa shpallën në kërkim Klisman Nikollin. Po ashtu nga hetimet e zhvilluara, hetuesit mundën të identifikojnë dhe dy trafikantët të moshës 28 dhe 30 vjeç që bashkëpunuan me ish-efektivët; duke prangosur njërin prej tyre. Për aksionin reagoi dhe Ministri I Brendshëm, Taulant Balla I cili përmes një postimi në rrjetet sociale ritheksoi se beteja me kultivimin fitohet vetëm duke ndërtuar një organizatë policie të pastër dhe integritet.