Ndryshe nga qëndrimet e Prishtinës zyrtare, Presidenti i Serbisë, Aleksandar Vuçiç ka deklaruar se asnjë ushtar dhe asnjë polic nga Serbia nuk ka hyrë përtej kufirit me Kosovën. Ai tha se policia serbe arrestoi tre policë të Kosovës 1.8 kilometra larg kufirit. “Këta njerëz nuk kanë çfarë të kërkojnë në zonën Tresava-Batnjik pa miratimin e KFOR-it, sidomos me tyta të gjata”, tha ai për Radio televizionin e Serbisë. Vuçiç akuzoi ndër të tjera kryeministrin e Kosovës, Albin Kurti, se me çdo kusht dëshiron të “shkaktojë luftë dhe konflikte”. “Do të shohim se cilat ishin qëllimet e vërteta të të arrestuarve”, tha ai. Duke komentuar raportimet e mediave se Qeveria e Kosovës ka ndaluar importin e mallrave nga Serbia, Vuçiç tha se kjo tregon se “dëshirojnë t’i torturojnë njerëzit në veri, t’i lënë pa ilaçe dhe ushqime elementare”. Pamjet: AFP