Presidenti serb Aleksandar Vucic kërkon që takimet me Kosovën në kuadër të dialogut, të shpeshtohen. Serbia i paraqiti një kërkesë zyrtare për këtë Bashkimit Europian. Vucic sqaroi se kërkesa u paraqit gjatë një takimi të zhvilluar në Beograd me të dërguarin e posaçëm të BE-së, Mirosllav Lajçak. “Serbia kërkon dhe dëshiron negociata me Prishtinën në çdo nivel, sa më parë, sa më shumë e sa më shpesh. Mendoj se është me rëndësi të flasim për secilën temë, për Asociacion dhe energjinë, por edhe të tentojmë të bëjmë çfarëdo, qoftë besim minimal mes nesh të mos vijmë në situata në të cilat ndodheshim para një muaji”, tha Vuçic, duke dëshmuar kështu një ulje të ndjeshme të toneve. Vetëm disa javë më parë, presidenti serb kërcënoi të dërgonte ushtrinë ne kufirin me Kosovën. Duke iu përgjigjur pyetjeve të gazetarëve lidhur me temat që ka diskutuar me Lajçakun, Vuçic u shpreh se ka shumë çështje për të cilat bisedojnë me zyrtarët e BE-së, por tha se Serbia insiston në takime më të shpeshta me palën kosovare. Përpara kreut të shtetit turk, Lajçak u takua në fund të tetorit në Vjenë edhe kryeministrin e Kosovës, Albin Kurti, me të cilin tha se diskutoi për progresin në dialog. Takimi i fundit në kuadër të dialogut të ndërmjetësuar nga BE-ja – ndërmjet presidentit serb dhe Kurtit ka ndodhur në muajin korrik.