Pasditja e kësaj të premte ishte tronditëse për kryeqytetin ku një punonjëse policie 21-vjeçe humbi jetën, pasi dyshohet se u vetëvra me armën e shërbimit. Kanë qenë fqinjët e 21-vjeçares Aldorjana Loshi që kanë sinjalizuar sallën operative për të shtëna armësh në pallatin e tyre në rrugën Todi Shkurti në kryeqytet. Thirrjeve të kolegëve për të hapur derën e apartamentit nga ku erdhi zhurma nuk iu përgjigj askush. U desh ndërhyrja e zjarrfikëseve që hapën me forcë derën dhe zbuluan të vërtetën tronditëse. 21-vjeçarja kishte qëlluar veten me një plumb në gjoks me armën e shërbimit, i cili kishte rezultuar fatal. Top channel mëson se Aldorjana punonte prej me shumë se një viti patrullë e përgjithshme në komisariatin nr 5 në Kamëz. Ditën e fundit të shërbimit e ka pasur të enjte ku sipas kolegëve nuk ka shprehur asnjë shqetësim. Policia mori dëshmi edhe të dashurit të saj, i cili po ashtu tregoi se marrëdhënia mes tyre ishte normale. Vajza jetonte vetëm në apartament dhe ishte me origjinë nga Klosi i Mirditës dhe kohë më parë kishte humbur të atin. Grupi hetimor i ngritur për rastin po heton në lidhje me rrethanat dhe shkaqet që e çuan të renë drejt këtij akti ekstrem. Ndërkohë po gjatë pasdites së të premtes një punonjës i gardës së republikës u vetëplagos aksidentalisht me armën e shërbimit teksa po e pastronte atë. 28-vjeçari u transportua në spital ku ndodhet jashtë rrezikut për jetën.