Kryeministrja italiane Giorgia Meloni zhvilloi një bisedë telefonike me Papa Leonin XIV të martën, në të cilën u trajtua mundësia që Vatikani të shërbejë si vendi pritës për negociata paqeje mes Ukrainës dhe Rusisë. Sipas burimeve zyrtare, Papa Leoni konfirmoi gatishmërinë e Selisë së Shenjtë për të ofruar jo vetëm një hapësirë neutrale, por edhe mbështetjen e saj morale dhe diplomatike në përpjekjet për t’i dhënë fund konfliktit. Kjo bisedë vjen pas një serie telefonatash të kryeministres Meloni me disa nga udhëheqësit më të rëndësishëm botërorë, përfshirë presidentin amerikan Donald Trump dhe disa liderë të tjerë evropianë. Sipas zyrës së Kryeministrisë, fokusi i këtyre bisedimeve ka qenë rritja e përpjekjeve ndërkombëtare për të nxitur një proces serioz dhe të qëndrueshëm paqeje. Kryeministrja italiane i shprehu Papës mirënjohjen e saj të thellë për angazhimin e vazhdueshëm në favor të paqes globale dhe për gatishmërinë e tij për të ndërmjetësuar në një nga konfliktet më të përgjakshme të kohëve të fundit. Ajo e cilësoi këtë si një akt fisnik që përforcon rolin historik të Vatikanit si një faktor moral dhe diplomatik në arenën ndërkombëtare.