Vetëm pak orë pas shkarkimit nga detyra nga Presidenti Vladimir Putin, ministri rus i Transportit, Roman Starovoit, i dha fund jetës. Politikani 52-vjeçar u gjet i vdekur nga një plagë me armë zjarri, në Moskë. Zyrtarët rusë iu thanë gazetarëve se ministri i saposhkarkuar vdiq nga vetëvrasja. Ai është gjetur i pajetë brenda makinës së tij, ndërsa vijojnë hetimet për të zbardhur shkaqet e plota të ngjarjes së rëndë. Zyrtarët e zbatimit të ligjit në Rusi u shprehën se një pistoletë që Starovoit e kishte marrë si shpërblim nga Ministria e Brendshme në vitin 2023, ishte gjetur në vendin e vdekjes. Starovoit ishte në Ministrinë e Transportit mëngjesin e të hënës, ku kishte drejtuar një takim para se të shkarkohej nga Putin. Para se të emërohej ministër i Transportit, Starovoit kishte shërbyer si Guvernator i rajonit Kursk të Rusisë, i cili kufizohet me Ukrainën, nga viti 2019 deri në 2024. Lajmi për shkarkimin e Starovoit nga roli i Ministrit të Transportit nga presidenti rus u përhap këtë mëngjes, vetëm 14 muaj pas emërimit të tij. Kremlini e njoftoi këtë në kanalin e tij Telegram pa dhënë arsyet e vendimit. Zëvendësministri Andrei Nikitin u emërua ministër i përkohshëm në pritje të miratimit nga Duma dhe u prit nga vetë Putin. "Shpresoj që ju do të përdorni energjinë, njohuritë dhe aftësitë tuaja organizative për të zgjidhur çështjet më të rëndësishme në këtë sektor", i tha Putin ministrit të ri, duke theksuar se transporti është "një nga fushat kryesore të aktivitetit në vend".