Presidenti amerikan, Donald Trump do të vendosë një tarifë prej 104% në importet kineze duke filluar nga e mërkura, ka njoftuar të martën sekretarja e shtypit e Shtëpisë së Bardhë, Karoline Leavitt. Kina u përball fillimisht me rritje të tarifave me 34%, si pjesë e paketës tarifore "reciproke" të shpallur nga Trump javën e kaluar. Por presidenti e përshkallëzoi tarifën në 50% pasi Pekini nuk e tërhoqi vendimin për të vendosur tarifa hakmarrëse prej 34% për mallrat amerikane. "Vendet si Kina, të cilat kanë zgjedhur të hakmerren dhe të përpiqen të dyfishojnë keqtrajtimin e tyre ndaj punëtorëve amerikanë, po bëjnë një gabim”, u ka thënë Leavitt gazetarëve të martën. "Presidenti Trump ka një shtyllë prej çeliku dhe ai nuk do të thyhet. Kinezët duan të bëjnë një marrëveshje, ata thjesht nuk dinë si ta bëjnë atë”, ka shtuar ajo. Ajo nuk ka pranuar të thotë se cilat kushte, nëse ka të tilla, do të konsideronte Trump për të ulur tarifat ndaj Kinës. Kina ishte burimi i dytë më i madh i importeve të Amerikës vitin e kaluar, duke dërguar një total prej 439 miliardë dollarësh mallra në SHBA, ndërsa amerikanët kanë eksportuar mallra me vlerë 144 miliardë dollarë në Kinë. Tarifat e ndërsjella kërcënojnë të dëmtojnë industritë vendase dhe mund të rezultojnë me pushime nga puna. “Gati 70 vende kanë kontaktuar Shtëpinë e Bardhë në kërkim të fillimit të negociatave për reduktimin e ndikimit të politikës tarifore të Donald Trumpit”, deklaroi të martën sekretarja e shtypit, Karoline Leavitt. Ajo u ka thënë gazetarëve se marrëveshjet do të bëhen vetëm nëse përfitojnë punëtorët amerikanë. Sipas saj, presidenti Trump ka udhëzuar ekipin e tij të punonte në “marrëveshje të personalizuara” për çdo vend që e kërkon atë.