Një grup ishujsh të shkretë, të pabanuar vullkanikë pranë Antarktidës, të mbuluara nga akullnajat, shtëpi për pinguinët, janë përfshirë në luftën tregtare të Donald Trump, pasi presidenti amerikan iu ka vendosur një tarifë 10% për mallrat. Ishulli Heard dhe Ishujt McDonald, territore të jashtme të Australisë, janë ndër vendet më të largëta në Tokë, të arritshme vetëm nëpërmjet një udhëtimi dy-javor me varkë nga Perth në bregun perëndimor të Australisë. Ato janë krejtësisht të pabanuara. Vizita e fundit e bërë nga njeriu besohet të jetë gati 10 vjet më parë. Megjithatë, ishujt Heard dhe McDonald u shfaqën në një listë të publikuar nga Shtëpia e Bardhë e “vendeve” që do të kishin tarifa të reja tregtare. “Asnjë vend në Tokë nuk është i sigurt”, tha kryeministri australian, Anthony Albanese. Ishulli Heard dhe McDonald janë të listuara veçmas në listën tarifore të Australisë, e cila do të shohë një tarifë prej 10% të vendosur për mallrat e saj. Territoret e jashtme janë pjesë e Australisë dhe jo vetëqeverisëse, por kanë një marrëdhënie unike me qeverinë federale. Territore të tilla të paraqitura në listën e Shtëpisë së Bardhë ishin Ishujt Cocos, Ishulli i Krishtlindjeve dhe Ishulli Norfolk.