Mbi 5 miliardë dollarë pritet të ofrojnë 25 shtetet që do të jenë pjesë e takimit të Bordit të Paqes për Gazën, deklaroi të dielën presidenti amerikan Donlad Trump. Shqipëria është mes vendeve që ka pranuar tashmë ftesën e presidentit Trump, i cili ndër të tjera tha se zotimet e vendeve anëtarë do të shpallen zyrtarisht në mbledhjen e parë të Bordit të Paqes, e planifikuar për 19 shkurt në Uashington, ku ai shërben si kryetar. Rindërtimi i Gazës pritet të kushtojë 70 miliardë dollarë, sipas vlerësimeve të Kombeve të Bashkuara, Bankës Botërore dhe Bashkimit Europian, pas më shumë se dy vitesh lufte. Sipas Trumpit, anëtarët e Bordit janë angazhuar gjithashtu “të sigurojnë personel për Forcën Ndërkombëtare të Stabilizimit dhe Policinë Lokale për të ruajtur Sigurinë dhe Paqen për Gazën.” Presidenti amerikan e përshkroi këtë grup si një iniciativë me “potencial të pakufizuar” që do të ketë një rol të madh ndërkombëtar në promovimin e paqes, duke theksuar angazhimin e tij personal si kryetar. Në postimin e tij në Truth Social, Trump gjithashtu theksoi se Hamas duhet të përmbushë angazhimin për demilitarizim të plotë dhe të menjëhershëm përpara se ndihma të shkojë përpara. Çarmatosja është një pjesë e rëndësishme e fazës së dytë të planit të armëpushimit të ndërmjetësuar nga SHBA, i cili u ra dakord në tetor mes Izraelit dhe Hamasit. Ky plan synon t’i japë fund konfliktit që filloi pasi Hamasi sulmoi Izraelin në tetor 2023. Në Uashington ndodhet edhe kryeministri izraelit, Benjamin Netanyahu i cili nënshkroi anëtarësimin e Israelit në "Bordin e Paqes" të Trump gjatë një takimi me Sekretarin e Shtetit të SHBA-së Marco Rubio.