Grupi i këshilltarëve socialistë të Bashkinë së Tiranës ka depozituar zyrtarisht kërkesën për shkarkimin e kryebashkiakut Erion Veliaj. Dokumenti është dorëzuar ditën e enjte pranë sekretariatit të Këshillit dhe mban firmat e të gjithë këshilltarëve të majtë, pas një mbledhjeje të zhvilluar në selinë e Partisë Socialiste të mërkurën. Në relacion këshilltarët theksojnë se “Tiranës i duhet një kryetar në detyrë”, duke argumentuar se mungesa e gjatë e Veliajt ka sjellë një boshllëk në drejtimin e përditshëm të kryeqytetit. Bazuar në ligjin për vetëqeverisjen vendore, konkretisht në nenin 62, kërkesa për shkarkimin e kryetarit të bashkisë mbështetet në parashikimin se ai mund të shkarkohet nga Këshilli i Ministrave, nëse “propozohet për shkarkim nga Këshilli Bashkiak përkatës për mosparaqitje në detyrë për një periudhë 3-mujore të pandërprerë”. Veliaj ndodhet në paraburgim që prej datës 10 shkurt 2025, me një masë sigurie të dhënë nga GJKKO me kërkesë të SPAK-ut. “Qytetit të Tiranës, me një zhvillim të pandalshëm ekonomik e social, i duhet një kryetar në detyrë për ndjekjen e punëve”, thuhet ndër të tjera në relacionin që shoqëron kërkesën për shkarkim. Mbledhja e Këshillit Bashkiak pritet të zhvillohet më 23 shtator, ku pritet të diskutohet dhe të hidhet në votim propozimi për shkarkimin e Veliajt.